Andernach. Jez es ed widde an de Zäit, datt me ons off Fasenacht on datt Jeckeje en ons enstelle. Su e besje ham me jo noch all en on, wänn me och schun älter säin. Manjesmol lääft noch emol alles an äinem vevbäi, bi ed Fröhe wor. De Obermöhn setzt an Schwerdonnerschdaach en de Schees on drömmerrömm all ihr Möhne. En de Kaffies on Wirtschafte wor Musikk. Nauze on Berliner wuren vedröckt, Wäin on Beer floss en Strömen. Ed wor en janz gruße Daach. Omens jungt ed schön maskeert off de Maskebäll. De Auswahl wor gruß. Em Schänzje, en de Rheinkron, em Anker, em Gabel ode em Propsteihoff. Üwerall jerappelte voll. Gerak on de Männejesangsverein. Datt woren Bäll, die Jeschischte jeschriwwe hann. Do es vill passeert.

Häi es de Fasenacht jeleevt wure en all säine Farwe. Do hätt su en schön maskeerte Fijur äine schun bes en de fröhe Morje fessele könne. Ed wur jedanzt, jeküsst on jeschwooft on ewije Treue jeschwor. Samstdaachs dann ab bäi de Rekrutte. Off em Maat wor de Mosterung. Ed wor en schwere Daach. Me mooßt vill trinke. Dofür hatte me Sonndaachs decke Aue on Alaaf konnte me och nur noch röschele. Nur ed Prinzeesse wur en de Rheinkrone aafjehaale. Sonndaachs wuren de janze Klamotte für de Rusemondaach parat jemacht. Awe dann, en aller Herrgottsfröh am Rusemondaach morje wur met de Trompet dursch Annenach jebloos on de Jecke jeweckt. De Vehaftunge woren zejang on de janze Stadt loch en em vedötschte Zostand. Me hätt sesch maskeert, on Erwessopp joof ed üwerall ze esse.

De Häuser säin met bontem Kräppapier jeschmückt wure. Meddaachs hamm me off de Zuch jewaat. Off äimol komten se all aanmascheert. All ons Korps on Veeine met ihre bonte Uniforme on klappernde Fasenachsorde off ihre schwere Ranze säin mascheert. Zwöschedursch Pärd on Musikkapelle, all de selwejemachte Motivware met Kamelle schmäisende Jecke.

All hann am Stroßerand jeschunkelt on jesunge on voll Freud de Kamelle offjerafft. Onserem Prinzepaar wur zoojejubelt. Annenach wor en äinzije Freudenstadt an Fasenacht jewees. Veilchendienstdaach do hätt awe alles nojeloos, on onsere Fasenacht wur met allem Prambori beerdescht. Am Öschermettwoch hamm me ons em Mariendom noch ed Öschekreuz aafjehollt. Omens jungt ed zoom Heringsesse bäi ed „Wutzetraut“ on met epaar Beer wur de jannze Fasenachsspuk eronnejespölt. Dehäim komt datt janze Fasenachsjedöhns ond Orde en mäin Keest on hätt off em Späischer off de nächste Fasenacht jewaat.

Gisela Pfeil