Wänn esch em Spätsummer üwe de Annenacher Woochemaat laawe, moos esch ömmer an de Enmachszäit von Fröhe denke. Do wor Ebbes loss en onsere Kösch. Mannewäis stond ed Jeschier für enzemache erömm. Grönschele, Mirabelle, Biere, Qwötsche, Kirsche, Bunne on Äppel. Alles moost jefäscht on jefitschelt würe. De gruuse Enmachs-kessel off em Herd wor ömmer am dämpe. Jefriertruhe on Plastikbeutele joof ed noch net, awe en jedem Keller stonden de Enmachsgläser. Alles moost en de Kösch sauwe jespölt on aafjewöscht würe, on de Gummiring ausjekocht. Stonnelang wur ed Qwötscheschmeer jeröhrt on aus dämm Entsafter es de Bröh erausjebrutschelt. Es dovon Ebbes denewejetreppst, hätt de janze Kösch jekleeft on ed wur widde jepotzt. Zwöschedorsch säin de jescheelte Äppelring off e Köddelsche offjezooch wure on komten für ze trockene off de Späije. Omens stonden dann en janze Haaf fettije Gläser für aafzeköhle off em Köschedösch. Se krochten noch en Zettel, batt dren wor on ed Datum, off de Bauch jekleeft. Am schönste hann de Firrsische ausjeseen. Rud on hellrosa hann se en dämm goode Saft jeläije. Se wuren em Wenter nur offjemacht, wänn Äihne krank wor ode Fiewe hatt. Vom Jelee on de Marmelade krochten me ömmer ze probeere, ob ed och stäif jenooch wär. Hatte me zevill jeleckt, joff ed och schun emol Bauchpäin. Woochelang wur en de Kösch jemängt on jeschafft, awe dofür wor onsere Keller en rischtije Fundgrub. Do stonden nau de janze Enmachsgläser bi de Soldate en Räih on Glied off ihre Hürdsche.

Em annere Keller lochen schun de Zwiwelle, Äppel on de Bahmnöss. De Krombiere woren bäim Bauer schun bestellt. Dann wor awe de ürschte Döppekooche fällesch. Nau konnt de Wenter kumme. Esch säin ömmer mol en de Keller gucke jange, ob e Glas offjange wär. Hann esch käins jefonne, wur koz an dämm Gummi jeflitscht, on schun wor ed off. Domet eroff bäi mäi Motter on vezeelt, datt Glas wär offjange, on mööst huttisch jess würe, sonst däht de janze Krom vederwe. Datt hätt se nur äimol jeklauft on dann de Kontrolle üwe ihre Enmachskrom selwe üwehollt.