Ed Bärbel woor e good kadolisch Mädsche. Wie dat en de fuffzija Johre su woor och siehr follischsam, weil de leewe Godd joa alles isiehn häd. Desweje häd ed sisch och drann ihahle, dat en de Fasdezeit off Ischnuggels vazischd weere mussd.

Awer eimoa es ed doch schwach iwoore. Zesamme mem Liesel, dat off Besuch en de Noabaschafd woor, hann se sisch bäim Bägga fier zähn Fännisch broune Kandiszugga vomm Block ikoafd. Die zwei Mädscha hann sisch off en Bank isädzd un ganz glegglisch ihre Kandiszugga ilutschd. Se hadden awer och paar Iwessensbesse debai, weil joa Fasdezeit woor. Ed Bärbel wolld dat off alle Fäll bäi de nägsde Beischd vazehle. Wann ed dann en Buß krooch, woor joa alles widder ausibischeld.

Offeimoa häd ed Bärbel säi Lehrerin komme isiehn. Ganz offireschd häd ed denn Kandiszuggablock, der joa ned grad klään un schbez und kandisch woor, deef en de Baggetäsch ischdobbd. Ed häd idaachd, dann dät ma säine Sindefall ned siehn. Awer falsch idaachd! Die Lehrerin, ihre Name well isch ned varoade, koam off die Mädscha zoo un häd ed Bärbelsche ausischannd, dat ed en de Fasdezeit schnuggele dät. Doamed ned inoochd, häd se imm ähn med de flache Hand off denn iwölbde un ifillde Bagge idachdeld. Dat häd enne em Mund su wiehidoan, dat imm de Dräne en de Ooche ischosse sein. Doa droff es die Lehrerin noch bäi de Babba vomm Bärbelsche igange un häd demm vazehld, bäi wat fier na schlemme Sach se säin Doochda erwischd häd.

Wie ed Bärbelsche heimkoam, krooch ed vomm Babba och noch die Lewidde ilese un ed Oamendesse es ischdresche woore. Awer de Babba häd im winsdens kään idachdeld. Bes Uusdere häd ed Bärbelsche en guuße Booche em jedes Zuggerschdänsche imachd.

Die Kenner vonn häid kennen sisch dat ned vierschdälle, dat suwat dumoals mischelisch woor.

Anita Trostel