Ains, zwai, drai, fiir Äckschdain alles muss färschdäckt sain, hinter mir und for mir gilt es nicht, ains, zwai, drai esch komme. Met demm Schpruch fing alles an wämme Feschdäjelsches geschbillt hann. Däjenije dä dänn Schpruch gesoot hät, schdonnt met fedäckte Ooche an de Wand, on musst dii annere Froinde söje goon, dii sesch feschdoche hadden. Su hat jedä säine Platz bo hä gedaacht hät, häi fend hä mesch net. Bär dann als ürschdes gefonne wuä, hät en de nägsde Rund söje müsse. On dat ganse hät fonn Forne angefange.

Met su Schbille hamme de Nommendaach römmgekrischt, bess dat me haim mussden, on et dung-gel wuä. Su Schbillgeschörr bii höit, bat me en Hülle on Fülle an jeder Äck ze koowe kräit, gowet zo mäiner Juchendzait net. Esch wääs dat mäine Ong-gel miä an Kresdaach mo en Planiirraup aus Bläsch geschänkt hät. Dii es met ner Kurbel bewääscht wure. Als esch dann et ürschde mo e bessje Sand domet wäggdrögge wollt, es dii Kurbel schonn kabott gegange. Na good, an Kresdaach hat esch en elektrije Zuch offgebout krischt. Domet hann esch dann och färzään Daach geschbillt, wail dä Zuch widdä abgebout wure es. Sufill Platz hadde me net dehäm dat dä schdoon bläiwe konnt. An en Fusball aus Ledä, met rischdije Plagge, kann esch mesch och noch erinnere. Owä sonst hamme nur jause geschbillt on säin och do gruss wure. Schdälze, met onneschiidlije Hüü bo me de Schoo droffschdälle konnt hamme oos bouwe loose, on säin domet dursch de Gejend gebrummt. Do woä omens dii Haut off de Knee ganz schön angeschrabt. Me schbillen Kleggesches! Wänn dat änä gesoot hät wore me all begaisdet. Also haimgeloowe on dii Kleggere gehollt. Et goof Kleggere aus Ton on aus Glas, dii nadürlesch och onneschiidlesch wärtfoll woren. Mem Absatz fomm Schoo hät me en Koul en de Boden gemacht, zwai Medä dofonn en Schtresch bo me sesch hinnschdälle musst wemme abwörwe wollt.

Bodrömm et ging woä, dä Kleggä en dii Koul ze wörwe, on hoffe dat hä drenn läije bläift. Dat hät net ömmä geklappt, dann musst me met de Fingere, dii Kleggere dii noch jause woren, en dii Koul rännflitsche. Wämme en leere Kadong hadden bo Schoo drenn fekooft wure säin, hamm de Däggel abgemacht, en dä Rand e paar onneschiidlije Löschä ränngemacht on dann fesoocht dii Kleggere üwwe zwai Mesdä dorännrolle ze loose. Nadürlesch hamme och Schlöidere gebout, öm domet off Schbatze ze scheese. Alään dat bouwe hät schonn Schbass gemacht. Me hät sesch en de Hägge en schöne Zwaag aus Haselnossholz geschnidde, dehäm zwai Änmachgummis on e Ledäpläggelsche gehollt, on met e bessje Droot zesammegefriimelt. Nadürlesch hat och jedä noch en Flitschebooche on angeschbetzde Fäile. Miä woren ausgerösst wii dii Kobois on dii Indianä.

En de Kinos liifen zo ooser Zait och die Tazan Filme. Me hadden noch kain Gäld füä ent Kino, owä häi on do groochs de och mo Tazan Heft. Ja bess de en de Märk on em Wald römmgeloowe on häss no Liane geguggt, öm och fonn Bomm zo Bomm ze schwinge. Hamme nadürlesch net gefonne. Owä owe am Jugendheim hät en schwäre Ääsch geschdanne, do woä am onnere Ast e deck Drootsäll festgemacht. Do konnt me sesch drannhänge on bii de Tazan dursch dii Loft fleje. Abentoijä puä. Fusball hamme nadürlesch och geschbillt, nuä net om Schbottplatz. Of de Wisse, bo dii Obstbööm droffschdonnden, hamme oos met demm Ball beschäfdescht. Höit säin dat Schtroiobstwisse. Dii Doorposde woren aimo dä Bommschdamm on of de annere Sait hät me en Knöbbel an de Boden gekloppt. Nadürlesch hamme fonn dänne Bööm och dat Obst gegässe. Do woret egal ob Kiirsche, Kwätsche, Brumme odä Äbbel, miä hann gesond geleeft. Bäi Wänd on Wedä säime jause römmgeloowe on hann oos Juchend genosse.

Lewe Leser haalt de Uure schdaif onbläift gesond.