Gierend. Zum nächsten Mundartstammtisch Kirchspel Honnefeld wird am 15. Oktober, 20 Uhr mit Döbbekochenessen in den Backes in Gierend herzlich eingeladen. Hier eine Kostprobe des letzten Treffens:

„Bie frejer de Kenddof ifejert woor“

Frejer wooren de meeste Kenner dehem iboren. Wenn et loss ging, holten de Männer de Amm. Woar et Kend dann doa, koam de Amm en Woch lang jeden Dach en et Haus no Modder un Kend guggen un versorjen. Em Wender bej Wend un Werrer woar dad net emmer su einfach. Bes zo de Kenddof sollt de Modder net iwer de Schlänk goan. Noa ver Wochen woor dad Kend idoft. Bej de Katholiken woor frejer idoft. En Jong hat meestens äner Padden und zwei Gooden, en Mädschen än Good un zwing Padden. De Padden mussten selwer konfemert sein un durften sisch nix ze Schold hon kommen lossen. Se mussten offpassen, dad et Kend ondlisch erzochen un versorscht woor. De Kenner hatten bej de Kenddof lange Dofkledscher, de Jongen met hellbloae -, de Mädscher met rosane Schleifjer on. Noa de Prerrischt koam de Amm met Modder un Kend erscht en de Kersch. De Famillisch un de Padden woaren alt doa. Frejer gingen bej de Dof nur de Modder met em Kend, de Padden un de Amm on de Altar. De Vadder stoan en de Bank off. En spärere Joahren ging er met noa fier. De Amm lacht et Kend alle Padden noaenanner en de Oarm. En Good hel dad Kend iwer et Dofbecken. De Pasdur hät et Kend idooft un em doabei Wasser iwer de Kop ilebscht. Doanoa goaf de Amm de Modder dad Kend un de Pasdur doad se ausseschnen. Et Kend kriesch en Dofschpruch. Em Stammboch woor alles enitroan. Doamet woar de Doof en de Kersch ze en. De Familisch ging heim un fejerte wejrer. Zo de Kenddof un spärer bes zo de Konfermation wooren de Kenner beschenkt. On Ustern goaf et ifärfte Eijer, on Chrestdach en Chrestkenschen un on de Konfermation schenkten de Padden et letzte Moal.