Wenn ens de Aujus faß ze End es, kann me ad he un do de ijerste Weihnachtspläzje sehn. Dat es me all ze fröh! Esch waden op dä Daach wo sech en de Rejale von de Läden de Nikoläus – Weihnachtsmänne un de Ustehase bejähnen! Em Internet hann esch jezz och noch ene „Vorfreudekalender“ jesehn. Do solle me vom 1.11. bes de 30.11. Düürche opmache. Dat es dann de Vürfreud op de Vürfreud! Es et ens Septembe, fladderen einem de Prospekte met de neueste Weihnachtsdekoratiun en et Hous. Düss Johr hatte me 33 Grad wie esch de 1. Weihnachtsprospekt ous em Brefkaste zeje dät. Esch daach, wenn esch jez en Australien wonne dät, dann könnt esch, wär esch jätt jönger un dönne, vlisch jätt me enem Nikolaus-Bikini anfange. Äwwe he bej oos?

Schwemmbad hät zo, Ejsbade es och nix, weg demet en de Papierkorew! Esch jing en et 3. Schulljohr, do jof et e paa Woche für dem 1. Dezembe bej Dreesbachs Adventskalende em Schaufinste ze sehn. Do hann esch me bal de Naas platt jedröck! Eine hatt et me besondesch anjedon. Dat wo jätt met Engelsche und Schlidde un dat dät all selweresch jelizere! Die einfache Kalende däten 30 Penning kosten un der Jelitzrije 50 Pennig! Dumols dät e Brütsche 6 Penning koste, do woren 50 Penning vill Jeld! Esch hann Deheim et janze Altpapier zesamme jeraaf un su vill esch konnt bej de Alträusche jeschlepp! Do hat esch addens 25 Penning, die ande Hälf jof me meng Motte dezo, su konnt esch menge ijerste Advendskalende kaufe! Esch hat imme jelizrije Fengere wenn esch e Düürche op jemach hat. Dann jof et ene Appel ode ene Tannezappe ze sehn un am 24. Dezembe woren zwei Düürche met janz vill Selewe drop. Kaum hat esch die Düürche op woren do en Maria un ene Josef met dämm Jesuskindsche ze sehn. No Weihnachte hann esch die Düürche all widde zo jemach un dä Kalende en Sejdepapier enjeweckelt. Menge Jeroßvatte hät en wegjepack un dat Johr do noh jof e me en am 1. Dezembe widde. Dat Selewe wo ad ziemlich fott, esch hann mesch äwwe trozdem drüwwe jefreut. Am 24. widde de Düürche zo, e paa mot menge Jeroßvatte ad repariere, enjepack un wegjeläsch. Su hät dä noch e Johr üwweläv. Äwwe dann wollt esch och keine mi hann. Späde hann esch selwe alle müjelije Modelle jebastelt un hat bej der Bastelej e su vill Freud wie Dumols an mengem 1. Adventskalende!