„Annenache Vezeelche“ von Gisela Pfeil
Fröhjohr en mäinem Jaade
Alles es awäi en Offbruchstimmung on erwacht zomm neue Lewe. En jedem Eckelsche kannste em Fröhjohr bejähne. Sujahr zwösche de Flastestäin fängt ed aan ze gröne.Batt Jeste noch bi e vetrockend Stöck Holz ausjeseen hätt, erblöht heut en strahlendem wäiß on de Hummele säin dren am danze. Üwe de Vuelstränk flejen de ürschte Möckeschwärm on mette off mäinem Wissje säin de Obbätzele (Ameisen) fläisesch en Bursch am baue. De Rittersporn scheest en de Hüh on ed Efeu kräit schun hellgröne Spetze.Off em Garaschedaach setzen zwei Elstere on zänken sesch ömm en Platz em Revier. Alles wüed parat jemacht für de ürschte Grillomend em Jaade. Blohmekäste wüeren jeplanzt on häi on do noch en Oleander offjestellt. De Stöhl noch aafjewöscht on dann könnt me off de Säsong für Düssjohr aanstuße. Esch setze mesch emol jemötlesch hin, dänn de janze Nummendaach hann esch dorömm jewurschtelt on jeplanzt. Awe halt, henne en de Eck hann de Schnecke schun suvill aafjefress, do mooß esch noch e alt Hausmettelsche ausprobeere. En Schaal met fröschem Beer on schun läien die Deersche am nächste Morje en der Bröh. Net grad appetitlesch, awe en schöne Dud. Aus de Nopeschaft reescht ed schun good no aangebrodenem Fläsch. Bäi ons wüed jez och vorran jemacht on de Besuch hätt sesch en em sonnije Eckelsche enqwadeert on waat off de Würschte on e Fläschelsche Beer. Heut es datt rischtije ürschte warme Wetter für no dämm lange, kalte Wenter emol drauße en de fräihe Natur sesch länger offzehaale. All säin se good offjeläscht nur onsere Hond lööst de Uhre hänge on hätt ja käi Spass. Bewäscht sesch vill langsamer bi sonst on kümmt bal net de Trepp erroff. Esch denke derekt an ebbes Schlemmes on säin och schun janz aus em Häusje. Dann beschnuppere esch me mol dänn Kerl on merke, datt e no Alkohol reescht bi e aafjestanne Glas Beer. Er mooß en der Zäit bo mir dorömm jeschafft hann die Schneckefalle leerjemacht hann. E hatt en rischtije off em Uhr. Mir hann en schloofe loose on en Roh onsere ürschte Grillomend em Jaade jefäert. Awe off säin Flasch Beer hätt Jeder an dämm Omend offjepasst.
