En Mutproov
Ab 1947 wor ich bai der Pfadfinder, och „Päddchestreeder“ genannt. Genauer gesood, ich wor Jungpfadfinder on et ersche Mol naachs ohne Ellere onnerweechs.
Mir hadden onser Zelde em Brexbachtal offgeschloon. Et wor net su gans äänfach, dohin ze komme, denn die Straicher em Wald woren johrelang net mieh geschnidde wore.
Dä besde on schnellsde Weech noh Sayn zom Trinkwasser holle ging enlang der Äisebahnglaise on iwwer klääne Bregge, die den Kriech onbeschädichd iwwerstanne hadden. On wenn en Berchhang em Weech wor, leef die Bahnstregg dorch Tunnele.
Su gans ongefährlich wor dat net, denn mir moßden jo emmer domet rechene, dat en Zuch koom. Domols sinn die Zich noch dorch dat Brexbachtal bes noh Grenzau gefahre. Fier Fußgänger wor dä Gang dorch die Tunnel voboode - fier uns wor dat en Mutproov!
On et goob jo en Meechlicnkaid, med der Uhre an der Glaise ze hiere. Wenn en Zuch koom, hädd mer en laises Summe gehierd, on dann eß mer besser net en su en Tunnel gegange.
Aawer an dem Daach wor nix ze hiere - also sinn mir dorsch de Tunnel gegange. Baal wor et gans don-gel dodrenn. Die Schotterstään onner unserer Fees hann geknarrt, hen on widder hädd en aale Blechbix geschebbert. Et wor gans gespensdisch.
Womet mir also net gerechent hann – mir hadden net genooch offgepasst on en Zuch wor am aanrolle.
Mir konnden uns nur noch off dä ongefähr 80 cm brääde Nuudweech neewer denne Glaise redde, uns an die mannshuhe Onnerstellnische raan taste on uns dodrenn eng annernanner gedreggd med drei Jonge onnerstelle. Wat hadden mir en Glegg gehadd, dat mir noch freh genooch en die Onnerstellnische gekomme on su winnichsdens dem Loftzuch von dem vorbaifahrende Güterzuch entkomme konnden.
Von dem Lärm eß et uns baal schleechd rewoore. Dä baißende Damp hädd uns fier kochze Zaid fast kään Lofd zom Odeme gelosse, denn die Lokomotive sinn domols noch met Kolle gestochd woore.
Nohdemm dä fauchende Zuch dä Tunnel volosse hädd, goob et fier uns nur ääns – schnell de Tunnelausgang erreiche.
Wie schrecklich kennen solch Minudde ohne fresche Lofd sain!
Helmut Krämer. Foto: privat
