Oh Tannenbaum oh Tannenbaum, wie grün sind deine Blätter. Dat Liid fomm Kressbomm hät me ömmä gesunge, wämme et ürschdemo am Kressbomm geschdanne hät, on dat woä an Hailesch Omend. Do woren onne annerem och Kiirze an dänne Tanneäst fästgemacht. Dä Bomm woä ganz häll erloischt. Dat met demm Licht hät säine Urschprung dodrenn, dat bess an Kressdaach dat Lischt, met der Gebuurt fonn Jesus, en dii Wält komme sollt. Memm Adwänzkranz fängt dat ganze Lischdäschbäktagel an. Ürscht ään Kiirz, dann zwai, dann drai, dann fiiä, dann schdäät dat Kresskinnsche füä de Düä. On met demm hälle Kressbomm es sümbolesch Jesus gebore.

En färdije Kressbomm hät me et ürschde mo an Hailesch Omend en de ejene fiir Wänn gesään. Schaimbar kammä et höit nimmi erwade bess Hailesch Omend es on schdällt dänn Kressbomm schonn zwai, drai Woche fürhär off. Dann es et och kään Wonnä dat dä Bomm, en dänne warme Woonzimmere, schonn an zwaide Wainachde riere dait. No kristlijem Brauch sollt hä doch bess „Maria Lischtmess“, Anfang Februa, met säine grööne Nodele schdoon bläiwe. Zogegewe, wail dat Woonzimmä net behaitzt woä ging dat. En Amerika es dat alles noch fill fröä. Do schdiin dii ürschde Kressbööm schonn Ände Nowämbä off dänne gruuse fraije Plätz, öm dii Lust äbbes füä Wainachde ze koowe, anzereeje. Su äänlesch entwiggelt sesch dä Kressdaach och häi bäi oos. Me fennt dat zwar schön wänn en beloischdede Kressbomm om Weiser Maadplatz on an de Kärsch ze sään es. Owä bat hät dat noch met demm Brauch Tannebomm an Kressdaach ze doon?

En Kressbomm sollt no aalem Brauch on Sidde ürscht an Hailesch Omend odä en Daach fürhär färdesch sain. Dii Adwäntszait, en der me sesch off dii Gebuurd fonn Jesus fürberaide soll würd wäggeschmesse. Et wär schön gewese, wämme nuä jeden Omend dii adwäntlije Schtroosebeloischdung angemacht hätte, on en Woch füä Hailesch Omend dii Bööm geschmückt on dann angemacht hät. Fröä hadde me en de Adwäntszait mii Gedold. Dii Zait em Adwent on dii Weinachtszait es dä soziale Kitt für Fammillije on Gesällschaft. Höit muss alles fill schnällä on deräkt sain, bii em Färnseen; Dä Fillem kümmt zwar ürscht am Fräidaach, owä en de Mediatek kanns de dänn höit schonn sään;. Dä Kressbomm hät bii alles och säin Äntwicklung metgemacht. Em Meddelaldä hät me, befüä dat Krebbeschbill ofgefüürt wure es, noch e „Paradiesspiel“ gezaischt. Als „Paradiisbomm“ hät me en Tannebomm gehollt, wail hä noch gröne Nodele hat. Dii Äst hät me met rude Äbbel behange, boraus schbädä sesch dann dii Kuele äntwiggelt hadden. Dii Zünfde em Meddelaldä hann dann dänn „Paradiesbomm“ met Söseschkaide behange, on aus demm „Paradiesbomm“ en „Zuggäbomm“ gemacht.

Dii evangelije Krisde hann dann dä Bomm met Kiirze beschdöckt on de „Lischdäbomm“ woä ärfonne. Dii Katoligge wollden fonn al demm Bommgedööns niggs wesse. 1896 hät en kadolije Pasdur gesoot:“ dii Efangelije wären en Tannebomm-Relegion“. Ürscht öm 1900 woä dä Bomm en de ganse Gesällschaft, bäi al Krissde, anärkannt, on hiis ab do „ Kressbomm“ (Christbaum). Hoit säime fruu dat me dii Tradizion wäidäfüüre könne, on oos met on an demm Kressbomm beschäfdije on ärfroije können. Esch wünschen oisch all en schöne Kressdaach met nem härlije Kressbomm.

Lewe Leser haalt de Uure schdaif on bläift gesond.