Eine Dialektgeschichte von Monika Nießen
Lesse liehre
Et wo noh de Summeferije en de 1. Klass, do rannt esch bej ohs de Wääsch ens widde eraff un feel hin. De Knie däten jätt bloode, esch nohm meng Töschedoch uss de Schüzzeltösch un dät drüwwe bozze, dann jing esch bej meng Fröndin spille.
Wie esch owends heimjing, dät me et Knie wieh un et wo och jätt decker wie sons.
Am andere Daach konnt esch net en de Schull jon, weil esch Fiebe hatt un dä Doktor kunn mot.
Esch weiß net mi op esch 2 oder suja 3 Woche deheim wo.
Wat esch äwwe weiß es, en de Schull däten meng Mitschüler lesse liehre dröm dät sech meng Motte Sonndaachsnommendaachs met mir an et lesse übe jen. Et wo en Jeschichte ous em Lesseboch „Meine liebe Fibel“, un die dät von en em Pott Hirsebrej handele, der imme wejde koche dät un de janze Stadt vollkoche, weil keine mi dat Woot für en anzehale kannt.
Meng Motte dät bal met me vezwejfele, esch konnt net lesse!
Mondaachsmeddachs sooß menge jöngste Onkel, der wo dumols en de 5.Klass, am Desch un sollt Aufjabe mache. Wie dä senge Ranze op mache dät, hatt esch do e Heffje jesehn, von dämm esch woß, dat wo Schund!
Wenn de Jeroßeldere dat sochen, jof et Ärje!
Jezz hat menge Onkel jesaat krisch, er möt met mir lesse übe. Der wo do net fruh drüwwe, äwwe er moot!
Menge Jeroßvatte hat os em Hoff en Breddebud jebout met enem Desch un ene Bank dren, wämme de Düür op lees, koom jenoch Lich für ze lesse erein. Et wo och warm an dem Nommendaach un su jinge mir zwei en dat Büdsche übe. Esch wo janz vesässe op die Heffje, dröm hann esch ihm jesaat: „Wenn de do druss met mir lesse übs, dann veroden esch desch net.“
E dät dat Heffe ouspacke un meng Fibel su drüwwe läje, dat me bej de Kontroll net opfeele.
Dat hätt och prima jeklapp!
Me woren de janze Woch flejssesch. Et wo menge Jeroßeldere ad jätt unheimlesch wie jood mir os vedrare däten, dat wo net off e su.
Am nächste Sonndaach dät esch menge Motte frejwellesch die Brejpott Jeschichte fürlesse.
Die hät jestaunt un menge Onkel un mesch jelob!
Esch hann menge Motte un de Jeroßeldere ijers beschtemp 10 Johr späde verzällt, wie de Tarzan, Tom Mix un Prinz Eisenherz, met dänne Ente un dä Micky Maus, hat menge Onkel et net, zu menge Bildung bejjedrare hann.
Un jood jezeichnete Comics, wie me höck sät, met enem joode Text lessen esch och höck noch jän!
